mga akí; nananárig ako sa Dios asin sa mga tawo!"
Nagpaáram dumán sa gurang, dangan huminale, suminangkay sa kabayo.
"Magtimaán ka!" an sabi sa malumbay na tingog kan mahandalon na filósofo, na kanayon ito sunoda kan saíyang paghiling; "pagmasdan nyato kun anong sampután kan pangyari na puminoón sa campo santo.'
Ngunyan nagkámaleng talaga ta haloy nang puminoón itong pangyari sa cementerio.
Kun su mga Guardia Civil na mga marhay an dangog, pakatapus na saringgawán su pintakasi, nangagdurumán sa sarong póok na midbid nyamó, bago sumagobósob su talá-ínit kan hapon mansanang ito, daing duwaduwa na sainda kutang nasompongan su saindang hinahanap.
Sa sarong sadit, alágad taranawon na kamálig, na pinatindog sa pangpang kan dánaw sa sarong kalangkawán na minaligtas kaito sa mga pagtalubó kan dánaw, sa táhaw nin mga mararambong na kabotongán, kabungahan asin kanyogán. Mga mapulang sorosarádit na mga búrak, síring baga kan kamangtigí asin maravilla nagtuturubó sa sarong magaspang asin binarogang likos, gibo sa mga gapong búhay na baga katutúbong hagyan pasíring sa dánaw. Su sa itaas binibilog nin mga nipá asin cabonegro na mga naiipit nin mga binuruwang na mga botong asin nasasamnohan nin mga langkoy na mga benenditahan kan Domingo de Ramos asin nin mga gibo lámang na mga búrak na timsin na haralé sa China: ilinalaog sa bukás na dungawan nin sarong kahoy na tanghid an sarong pambihirang sanga asin hinahamog nin amyo an angkas. Sa ibábaw kan caballete kan atop may nagsasarakat luhay-lúhay mga lálong asin guná, alintanang su iba nawalat sa pagiriba nin mga pato, mga pavo asin mga salampati tangáning matapus na tukaon gabós na mga húring tipasí nin pároy asin maís sa sarong bilang baga sarong kalikosan.
Sa sarong pantaw na kawayan, sa pangungurawa kan liwanag kan aldaw saróng daraga na magpoón sa
