"Aram ko, asin ta ini lalong maráot. An gabos na mga pagbaklé na mga halé sa kalangkawán pinapadaihán nin halaga pagdatong sa ibabá huli sa dai nin dátang ugalé nin kagabsan, síring baga, halimbawá, kan bulanos na pagmawot na magkayaman sa halipot na panahón asin dai pakasábót kan banwaan, na piñapabayaan lámang an anó man. An mga kapalabilabihan dai masasagwé nin sa hádeng pagboot sagkod na an paggibo kaiyán dai pangatamanon nin sarong maimon na may katongdan, sagkod na dai itao an katalingkasan sa pagtaram laban sa mga kapalabilabihan kan mga nasa kapangyarihan: an mga mokná magdadaránay na mokná, an mga kapalabilabihan mga kapalabilabihan man giráray, asin an namomongayahan na may katongdan matotórog sa lubós na kamoninongan. Labis pang gayo, kun, sakalé, may dumatong na sarong may halangkaw na katongdan na may darakulá asin mga mabansay na kaisipan, minapoón tolos nin paghinanyog, alintánang sa likod ibinibílang syang sarong mangmang: 'Dai midbid kan Saimong Kahalangkawan an Kaporóan, an Saimong Kahalangkawan dai tatao kan ugalé kan mga indio, mararaot an ugalé kan mga iyan huli sa Saimong Kahalangkawan, orog karahay kun an Saímong Kahalangkawan magtiwala ki fulano, ki zutano asin sa iba pa,' asin maniniwalang bulanos an Saíyang Kahalangkawan, ta talagang dai nya midbid ining Kaporoan ta halóy sya sa America, laén pa kaini, igwa sya nin mga kakundían asin mga kaluyahan siring sa táwong siisay man. Nakakagiromdom man an Saíyang Kahalangkawan na sa pagkamit kan saíyang minamawot, dinaplós sya nin marhay asin nagtíos sya nin makuri na tolong (3) taón lámang syang magdadánay sa saíyang kamugtakan, na sya naggugúrang asin kaipuhan na dai sya magísip nin mga
