"Ohó! Ohó!"
"Kung siring iyo ini an sakong pásib," an sabi na itinao ki Maria Clara su kapedaso; "mapatogdok ako sa banwaan nin sarong paadalan sa mga áking mga lalaki asin mga babaye; an paadalan na ini iyo an sakong regalo!"
"Asin iyán saró pang kapaknit, anó man an boot sabihon?"
"Ini itatao ko sa nagkamit nin orog karaot na simbag!"
"Ako! kun siring sakuyá!" an sabi ni Sinang sa halangkaw na tingog.
Itinao saiya ni Ibarra su papel asin maliksing hominarayó.
"Asin anong boot sabihon kaini?"
Alágad su namomongayahan na hagbayon harayó na asin nagpadagos nin pagkáwat kan ajedrez.
Si Fray Salvi siring sa ribaraw rominani sa maogmang tiripon kan mga bagong tawo. May pinapahid si Maria Clara na luhá nin kagayagayahan.
Naontok su ngisi asin natonong su orolay-ólay, tinotorohokan kan cura su mga hagbayon, asin dai nakahilwas ni sarong katagá; an mga ini naghaharalat na tumaram sya asin daing girironggirong.
"Anó ngaran kaini?" nakapaghapot man giráray katapustapusi, kinoa su librito asin pinagborobuklit. "An Rueda nin Kapaladan, sarong libro nin káwat," an simbag ni Leon.
"Dai kamo nakaisi na kasal-an an pagtubod sa mga bágay na siring?" an sabi, asin pinásing sa kaangotan su mga dahon.
Mga soriyaw nin pagtaka asin mga kasingpilan nin boot nagpanggorobkas sa ngosó nin kagabsan.
"Lálong dakúlang kasálan an pagipos kan bakong saiya laban sa boot kan kagrogáring!" nagsimbag saiya si Albino na kanayon tindog. "Padre Cura, inaapod iyán na paghâbon asin ta ipinagngangálad nin Dios asin nin mga tawo.
Pinagtakop ni Maria Clara su saiyang mga kamot asin hiniling nin mga matang luhá-luhaan su natatadá kan librong ito na dai pa sana nahahaloy pinamongaya siya nin makuri.
