“!Marhay na Tia Isabel!’ an sabi kan seminarista; “na mahidaw kan sira an tibig sa kadikit man lamang na horas.”
Si Andeng kasama ni Maria sa pagsoso, minsan ngani may malinig asin magayagayang panglawog, bantog na marahay magloto. Nagandam nin sabaw, kamatis asin iba, pinagtabangan o pinagolang siya nin nagkapira na, sakali mga muyang magkanigo kan saiyang mabansay na boot, su mga daraga naggigirito kan ogbos nin karabasa, su guisantes, asin pigporotol su tapayas nin haralipot, na garong cigarillo kaharalaba.
Tanganing maaling su kalangkagan kan mga naghihimuyaw-ot na makakita kun paano an pakahalé kan mga sira na mga burthay pa asin namimirikpisik, sa kolongan, kinoa ni Iday su arpa. Si Iday baké sanang marahay na magkabray kan instruméntong ini, kundi mga magagayon pa an saiyang mga moro.
Pominarakpak su mga bagong-tawo, kan hadokan ni Maria Clara su arpa, instrumento na iyong orog na tinotogtog sa lalawigan na ito asin iyo man an magkakanigo sa siring na mga pagkamugtak.
“!Awita daw, Victoria, su awit sa Pagkasal!’’, an hagad kan mga magtrang na babaye.
Nagngasolang su kalalakihan asin si Victoria na marayrahay su tingog, nagsarahotan na siya paas. An awit nin Pagkasal sarong marayrahay, alagad mamondong kantahon na tagélog saen ilinaladawan an gabos na mga nagtios asin mga kamondoan sa kamugtakan na ini, na dai man lamang nasasambit ni saro kan mga kagayagayahan kaiyan.
Sa bagay na siring, saindang hinagad na omawit si Maria Clara.
“An gabos kong mga awit anas na mga mamondo.”
“!Dai bale, dai bale!” an sabi kan kagabsan.
Dai na nagpasiro-siro, kinoa su arpa nagtogtog nin pasakalye asin nagawit.
- !Mahamis an mga horas sa sadiri na banwaan,
- Saén katood na gayo an lambang sinasaldangan;
- An simuy na minaagi sa patag, ay, kabuhayan,
- Kagadanan mamungaya, malodokon an pagmahal!
