rong asin saró pa nagpahiling sakó nin pagkamaginoo. Kan makihumápot saiya su Alcalde dapit kan isinabi ko saimo, dai syang ibang ginibo kundi mga pagomaw sakúyá, asin ta dai nagbugtak nin minsán kadikit man lámang na kaolangan. Alágad nakita kong mominalos su saímong lawog; hare kahandal ta dai makakasabay sató sa sakayán."
May nádangog na mga maliksing linakaw: su cura na may hilaw na ngisi sa saíyang ngosó.
"Malípot an doros," sabi; "kun may nadadakop kan sípon dai binobuhían sagkod na dai omabot an tigínit. Dai kamo natatakot na maliptan?"
Tinatakigan su saíyang tingog asin sa harayó su saíyang paghiling: dai nya pinaghihiling su mga bagong-tawo.
"!Bakó, sa samuyá garong mabansay an kabanggihon, asin marayráhay an hinoyophóyop!" an simbag ni Ibarra. "Sa mga bulan na ini an samong yayayat (294) asin an patutuyo (295); may minatarakdag na mga dahon; alágad sa giráray may minaruluwas na mga búrak."
Hominagayhay si Fray Salvi.
"Natuklasan ko na magayonon an pagkaagom kan duwang (2) ining katarahanan na dai sinasábayan kan malipot na amyam (296). Sa Febrero masurublak an mga búkol sa mga sanga kan mga kahoy na nagbuburunga, asin sa Marzo hirinog na an mga búngang-káhoy. Pagdatong kan mga bulan na tigínit máduman kami sa ibang póok."
Hominoyomhoyom si Fray Salvi. Nagpoón sindang magolayólay nin mga bagay na indiferente, dapit sa panahón, sa banwaan, sa fiesta; naghanap nin pasahótan si María Clara asin ominaliwayway.
"Asin mantang dapit sa mga fiesta an satong pinagoorolayan, togote ako, tabí, na anyayahan ko ika sa gigibohon mi noodmá. Piknik na pinagpapataraotao nyamó asin an samong mga kaúgay-nin-boot."
"Asin saén gigibohon?"
"An muya kan mga daraga sa sapá na nagbobolos sa haraning kadlagán, sa may balití; kayá, mamata kaming ámay tangáning dai kami abotón kan ínit."
Nagisipísip su religioso, dangan sominimbag:
"Makadadagkang bulanos an anyaya asin sakúyang inaakó sa pagpatotoo saimo na dai na ako saímo nin ma-
