“!Kun muya nyang makauli su nawara saiya,” an sabi pa, “hagadon nya sa saiyang San Antonio o magsombong sya sa nuncio!” (282)
Nin huli kaini, pinaluwas si Sisa sa cuartel, haros ipagtoldang ta habeng maghiro.
Kan sa tahaw na kan lansangan, lominakaw pasiring sa saiyang harong, marikaés, daing soklob su payo, dai nahugayan su bihok asin sa harayo su paghiling. Makosogon su saldang sa lontokan asin dai nin panganoron na makalipod kan liwanag kaito; nanghiriré-hiré su mga dahon kan mga kahoy huli kan hoyophéyop ninsi doros, haros mamara na su lansangan; dai, mayé minsan sarong (1) yamon na nangahas humarayo sa lindong kan mga sanga.
Sa katapusan nakaabot man giraray si Sisa sa saiyang haronghérong. Lominaog duman, daing korokaalo, daing gimokgimok; linibot ito, lominuwas, lominakaw minsan saén. Dangan nagdalagan sa harong ni gurang Tasio, nagapod sa tata, alagad dai duman su gurang. Nagbalik su daing palad sa saiyang harong asin nagpooén nin pagapod sa halangkawon na tingog: “!Basilio! !Crispin!” asin mandiit-mandiit minaérong asin nanghihimaté. Inoolit kan aniningal su saiyang tingog; su mahamis na inorokotok kan tubig sa haraning salog, su tinagistagis kan mga dahon kan mga kawayan iyo lamang an mga tingog sa kaawagan. Ominapod liwat, sominakat sa kalangkawan, tominaroron sa sarong (1) salogan, dominalohog sa salog; nalalagalag su saiyang mga mata sa katakotakot na paghiling, nagtataga-roroliwanag nin mga burthay na saga, pakatapus, nangdidiriklom, siring kan langit sa bangging nagbabarongbarong: masasabing nagsisirisiri su ilaw kan pagisip asin madalé nang maparong.
Suminakat naman sa saiyang harongharong, tominukaw sa banig na hinigdaan ninda kan bangging tominalikod, itiningkélag su mga mata asin nakita an sarong (1) paknit na gubing ni Basilio sa poro nin kawayan sa dingding okun lanob, na dongaw sa harani kan angpas. Bominuhat, kinoa ito asin pinaghilinghiling sa liwanag kan tala-init; an kapaknit na ito may mga digta nin dugo. Alagad garong dai ito nahiling ni Sisa, tara lominusad asin padagos na pigparahilinghiling ito sa tahaw kan nagaatak-atak na saldang, saiyang initaas;
