hanap-buhay siring kan sinundan ko, ta kun an toklos ginibo sa karaotan nin boot asin kasopogan, sarong pasakit asin huli aroaldaw ipinagpagiromdom sakuya aroaldaw kan paadalan su kapagduhagihan sakuya na minapaagi sakuya sa mga mapapait na takna. Alagad anong sukat kong gibohon? Dai ko mahimong haleon an kalinglingan kan sakong ina, kinaipuhan kong sa- bihan siya na su tolong taon na saiyang pagpakasakit sa pagtao sako kan carrerang ini iyo na ngunyan an minabilog kan sakong kagayagayahan kinakaipuhan na patubodon ko siya na an hanap-buhay na ini orog kapano nin dangog, an toklos makamomoyang bulanos, an dalan lakop nin mga burak, na an pagotob kan sakong katongdan minatamo sako nin mga kaugay-nin-boot, ginagalangan ako kan banwaan asin pinapano ako nin mga pagisusugad, kun iba an sakong gibohon, dai man mahahalé an sakong pagkadaing kamongayahan magkakaigwa ako nin hanap-buhay na lalo pang daing palad, laen pa na daing kapakinabangan, sarong kasalan. Nagdanay ako sa sakong katongdan asin habo kong lumuya su sakuyang boot.”
Ominorong nin kadikit su maestro dangan nagpadagos:
“Magpoon kan aldaw na pinaglanghadan na gayo ako, nagsiyasat ako sa sakuya mansana asin natuklasan kong talagang dai man nanggad ako nin pakasabot. Inadalan ko aldaw, banggi, su kastila asin gabos na may pakalabot sa sakuyang carrera, pinagpapasubli ako nin mga libro kan magurang na pantas, ano man na sakong matuklasan binabasa ko, asin inoogid ko ano man na sakong nababasa. Huli kan mga bagong pakatalastas na sakong nanod-an sa gamping digdi okun duman, nagliwat su sakong pagsabot, asin nakakita ako nin dakol na mga bagaybagay sa irarom nin pagkamugtak na totoong laen kan sa énot. Nakakita ako nin mga kamalean sa kaito dai akong ibang nahihiling kundi mga katunayan, asin mga katunayan na sa sakong pagloba mga kamalean. Siring baga, halimbawa, kan mga paghampak, na magpoon pa kan mga panahon na dai na nagigiromdoman iyo an tanda kan mga paadalan, asin ta kaito iyo lamang an paaging bulanos sa pakanood sa bagay na siring pinatood kami na magkaigwa nin siring na paniwala, pakatapus natuklasan kong harayo sa pakatabang sa kauswagan kan aki, minapal-
