sarong (1) Pagomawon?"
"Ohó makatolong (3) sarong (1) Amá Nyamó..."
"Ipagpatawad mo, Hermánang Sipa!" an ágaw na tataramon kan Rufa; "maninigong pangadyeon an mga iyán sa ibang palakaw; an mga lalaki dai ipagsalak sa mga babaye: an mga Amá Nyamó mga lalaki, an mga Tara Kagurangnan María mga babaye asin an mga Pagomawon iyo an mga akí."
"Ee! Ipagpatawad mo, Hermánang Rufa,; an Amá Nyamó, Tara Kagurangnan María asin Pagomawon nakakaaragid sa malotó, sirá asin sarsa, sarong (1) kakanon kan mga santo. . .!"
"Nagkakamalé ka! Hilinga sana, ika an nagpapangadyé nin síring, dai mo inaabot an saímong hinahágad!"
"Asin ika huli sa pagpangadyé mo nin síring, dai kang nakokoang anó man sa saímong mga novena!"
"Siisay?" an sabi kan Rufa na kanayon tindog; "dai pa nahahaloy nawaraán ako nin orig-oríg, nangadyé ako ki San Antonio, asin nakoa ko, malá ngani ta ipinabákal ko sa marhay na halaga. !abáa!" "Iyo? Kayá sabi kan saímong kanátad ipinabákal mo- daá-su saró (1) nyang orig-oríg!"
"Siisay? An daing sópog na iyán! Sakalé, síring ako saimo . . .?"
Kinaipuhan na makilabot su maestro tangáning magkaigwa nin kahusayan; dai na nin nakagiromdom kan mga Amá Nyamó, mga orig na pinagoorolayan.
"Vamos, vamos, hare kamo pagíwal huli sa sarong (1) orig-oríg, mga Hermanas. Tinataohan kita nin panganinohan kan Mahal na Surat: dai iniwal kan mga hereje asin mga protestante si Jesucristo, Kagurangnan ta, na inalaw sa túbig su pangkat nin mga orig na saindang mga sadiri, asin kita na mga cristiano, asin saró pa, mga Hermanos kan Santísimo Rosario, kaipuhan na magiriwal kita huli sana sa sarong (1) orig-oríg? Anong sasabihon kan satong mga kalaban, an mga Hermanos Terceros?"
Su gabós dai nagkaraalo, na saindang pinagtakahan su harárom na kadonongan kan maestro asin nagkatarákot kun anong sabihon kan mga Hermanos Terceros. Su maestro na namongayahan kan pagkúyog na ito, nagliwat nin tingog asin nagpadagos:
"Madalé na kitang ipaapod kan cura. Sabihan ta sya
