Europa, sa Manilá igwa sindang oratorio, may lamesa sa pagádal; sa lugar kan makalimos na fraile; an fraile sa Filipinas nagwawaras kan bulawan panó an kamot sa mga dukhang indio...
"Hilinga nindo, uya si Padre Camorra!" an sabi ni Ben Zayb na nawalatan pa kan efecto kan champagne. Asin itinotokdó an retrato nin sarong fraile na maniwang, na baga naghohorophórop, nagtutúkaw sa may sarong lamesa, natotokod su payo kan pálad asin nagsusúrat nin sa paghoná ko sermon. Naliliwanagan sya nin sarong lámpara.
Su katumang kaito nakapangisi sa kadaklan. Si Padre Camorra na nakalingaw na ki Paulita, nakasalom kan kaisipan asin naghapot man. "Asin siisay an naagidán kan sarong ining tawotawo, Ben Zayb?"
Asin ominarak-atak.
Sarong gurang na babaye na buta-sa-ibong, nagsosorogayong, nagtutukaw sa salog síring kan mga diosdiyos na indio, namamalansa nin mga gúbing. Orog na marhay su kasangkapan: kalongkake, su mga baga mga oropel asin su nagaalimbúkad na aso mga birilogbílog na gapas na mga maatí, na pinirirípit.
"Eh, Ben Zayb, bakong mangmang su ominísip kaiyán?" naghapot na nagngingisi si Padre Camorra. "Dai ko nakikita an boot mong sabihon!" an sabi kan taga-pamahayag.
"Pero !puñales! dai mo nahihiling an paksa, la prensa filipina? An kasangkapan na iyán na ipinagpaplansa kan gurang na babaye, pigaapod digding prensa!" Nagpang-orólok asin si Ben Zayb mansana igot sa boot su kangingisi.
Duwang soldados kan Guardia Civil na igwa nin letrero na "mga civil" nasa-likod nin saró katawo, na nagagapus sa kamot nin matoos na pisí asin su pandok nalilipdan kan kopyá: pinapaksaan (250) nin "an Bansá kan Abaka" asin garong babadilon.
Kadaklan kan mga tagapagdálaw nyamó dai nagkaoroyonan kan exposicion. Nagoorólay sinda dapit sa mga pagsusundan sa síning, naghahanap an mga ito nin pagkabaragaybágay, su saró nagsasabi na an tawotáwong ito mayó nin pitong payo, na kúlang ito nin sarong dongó sa pandok, ta daing iba kundí tolo, na iyong na iyong minabugtak ki Padre Camorra na baga nagmo-
