Asin ngunyan na sáyod,
Pírit akong itatápok.
Ako saén man itápok,
Nin kapagalan tagob,
Di na makakatoróhok
Sa gadung na galanyog.81
Túbig mong bakong malábog,
Símong masanggáyang érok."
Kan ini ikagalahod,82
Nagtangis, nagsiloksigok,
Su damit na mga mahal
Hinaralé nyang anan,
Dumán kaitong lalamban,
Na bulawan an kabagay.
Kasungani mahawanan
Bahanding83 makagayonan,
Mamondó na binayaan
Mga darakúlang bidang,
Sa makuri na monínong,
Banggi na malipungawon,
Arabiano mamondoon,
Makúring nánok, maimbong.
Kasu daing nadadangog
Dumán kaito na lungsod,
Kundi su hinoyophoyop
Ninsi doros na malípot:
Rinilítay84 su lansangan
Kaidto na kahadean,
Na garo na sarong olang,85
Malungsi na bagang bangkay,
Pinarigos nin hinang;
Saen man namamatean;
Kun gayod minahagayhay,
Sa labis nyang kasakitan.
- 80 Edificio.
- 81 Siring sa halangkawon na niyog.
- 82 Ikasabi.
- 83 Alajas; joya.
- 84 Iniribong.
- 85 Desierto.
