mga tawo na napapalibotan si Simoun, asin pinaghihirilinghiling su lampara; nakadangog nin manlaenlaen na mga pagbabaté, mga hagayhay nin panggilantas; su mga kataga na “comedor, pagsanay” nagkapira ulita; nahiling nya na naghoyomhoyom su General asin pinagbana-bana nya na sasanayon kan banggi mansanang ito siring sa itinalaan kan joyero asin, daing duwaduwa, sa latok na papamanggihan kan Saiyang Kahalangkawan. Nawara si Simoun, pinagsunod nin dakol na saiyang nga tagapaghanga.
Kan makahahadit na itong hidalé nagtagumpay su saiyang marahayon na puso, nalingawan su saiyang mga kaongisan, nalingawan nya si Juli, boot nyang iligtas su mga daing pagalamaan asin nagholaw na padagos, mangyari kun anong nangyari, ominibong sa lansangan asin boot na lumaog. Alagad nakalingaw si Basilio na bakong marhay su saiyang panggubingan; inolang sya kan portero asin sinabihan sya nin mga daing datang mega tataramon, asin kan makita su saiyang pangongotiil, pinagbantaan syang maapod nin sarong pareja nin Veterana.
Kan hidaleng ito naglulusad si Simoun na marorolungsi. Pinabayaan kan portero si Basilio sa pagtaonggalang ki Simoun na baga sarong santong minaagi. Nasabotan ni Basilio sa pamandokon na tinatalikondan sagkod noarin pa man su mapanganib na harong asin ta may padokot na su lampara. Alea jacta est (414). Dara kan instintong mabuhay, nagisip kun siring na iligtas an saiyang sadiri. Manyaring may makaisip na siisay man sa pagosyoso na hirodn su lampara, paoldoton su metsa asin dangan kaiyan, mapotok asin gabos magkakatarambonan, Nadangog pa si Simoun na nagsabi sa cochero:
“!Escolta, pikahi!”
Nanggilantas asin sa takot na dai mahaloy madangog nya an makangingirhat na potok, siring sa saiyang makakaya naghumari si Basilio na makaharayo sa isinumpa na itong sitio: sa saiyang paghona su saiyang mga paa mayo kan kinakaipuhan na liksi, su saiyang mga bitis nagdadarosay duman sa asera na minsan naglalakad garong dai naghihiro, natatapaan su saiyang agihan kan mga tawong saiyang ipigsasarabat asin baga makalakad sya nin duwang polong lakad, sa saiyang paghona nakalihis nin dai kumulang sa limang minuto.
