makangingirhat na Pere, nakita nyang luhayluhay na ominagi sa zaguan, doko na baga naghohorophorop. Namatean ni Basilio na maluya su kinttad kan saiyang puso, na nangririlipot su saiyang mga bitis asin mga kamot asin su maitom na ladawan kan joyero garong dakulaon nang marhay asin makangingirhat, nalilikosan nin mga laad. Duman ominantord si Simoun sa may hagyanan na baga nag-aalangalang; dai naghahanos si Basilio. Su pagduwaduwa nagdanay lamang nin kadikit: itinongkahal ni Simoun su saiyang payo, suminakat na gayo sa hagyanan asin nawara.
Sa akala, kun siring, kan estudiante na mapotok su harong dai mahahaloy asin mga lanob, mga lampara, mga inanyayahan, atop, mga bintana, orquesta, nagrurulupad isinarabwag sa angkas baga sa-gogom na mga baga sa tahaw nin potok na baga hale sa infierno; nangalagkalag sa saiyang palibot asin sa paghona nya mga bangkay an saiyang nagkakahiriling bakong mga osyoso; nahihiling nyang rorotang an mga ito, garong pighihiling nya na napapano nin laad su angkas, alagad su kamoninongan kan saiyang isip nagtagumpay sa agi sanang alisngaw na ito nin payo na pinangangatigan kan punaw asin nagsabi sa irarom kan saiyang boot:
“Sagkod na dai lumusad, dai nin pagalaman. Dai pa minabot su Capitan General!”
Asin naghinguhang makita syang monininong na malupig nya an pangibigkibig kan saiyang mga bitis, asin pinag-aaling nya su saiyang sadiri huli sa pagiisip dapit sa ibang mga bagay. May nagtutuya-tuya sa laog kan saiyang ginhawa asin pinagsasabihan sya:
“Kun tinatakigan ka ngunyan, bago mangyari an iyo na sanang mga hidalé, paano an saiyang paggawé kun makita mo nang nagbobolos an dugo, nagraralaad an mga harong asin nagsisiriwik an mga bala?”
Ominabot su Saiyang Kahalangkawan, alagad dai kaito nagmangno su haghayon: pinagmamasdan nya su lawog ni Simoun na saro sa mga luminisad sa pagsabat saiya, asin nabasa nya sa saiyang dai mapapalop-ong lawog an hatol nin kagadanan sa gabos na itong mga katawohan, asin nin huli kaini dinakop sya nin bagong ngirhat. Nangrilipot sominanding sa parel na kodal kan harong asin, napopotitok su mga mata sa bintana asin nanghihimateng marhay, boot nyang tod-an su alonggating mangyari. Natanaw nya sa bilang su
