mga babaye!”
Sagkod ngunyan an makaugay na dios nakokologan pa kan singil kan modista.
“!Aki! taohi ako nin mga tabing na kagduwang pisos an vara asin makikita mo kun baga somol-ot ako kan mga dugnit na ini!” an may kabaldian na simbag kan diwata; “!Jesus! magtaram ka kun igwa na nin mga masamwang na saimong mga sinondan!”
Alintanang nangyayari an mga ini, si Basilio, sa atubangan kan harong, kasaralak sa pangkat nin mga osyoso, nagbibilang kan mga tawong nagrorologsot sa mga lunadan. Kan mahiling nya an siring kadakol na mga tawo na mga maogmahon, mga tiwalang gayo; kan makita nya su novio asin su novia, pigsosonod kan saiyang mga abay nin mga daing pagalamaam asin mga mabibining mga daragitay, asin pinagisipisip nya na magpapakasompong duman nin sarong makangingirhat na kagadanan, inabot sya nin hérak asin nakamateng naghuhubya su saiyang kaongisan.
Nagkaigwa sya nin horot na iligtas na siring kadakol na mga tawong mga dai nin pagalamaam, nagisip na sumurat asin magtaong pakadram sa may kapangyarihan; alagad may ominabot na sarong coche asin luminogsot si Padre Salvi asin si Padre Irene, magkasi nasisinangan na gayo, asin siring sa agi sanang panganoron, nagpururawas su salyang mga marhay na kaisipan.
“!Ano sako?” an sabi sa irarom kan saiyang boot “ta magbayad an mga banal huli sa mga parakasala!”
Asin dangan suminabi pa sa pagpatiwasay kan sa iyang kariworongan: (412)
“Bako akong tagapagbuyagyag, dai ako sikat magpalabilabi sa pagtiwala na ibinugtak sa sako. May utang ako saiya na labis pa kan utang ko sa gabos na mga iyan; sya an nagkotkot kan hukay kan sakong ina; an mga iyan iyo an gominadan saiya! (413) Anong labot ko sainda? Ginibo ko an gabos na mahihimo tanganing magi akong marhay, mapakinabangan; naghinguha akong makalingaw asin magpatawad; magtios ako kan gabos na mga pagpupumirit asin daing ibang hinahagad ko kundi pabayaan ako sa katiwasayan! Dai ako nagsasaraw sa kiisay man... Anong ginibo sakuya? !Rumulupad an saindang mga kabtang winarasak kan angkas! Kaniguan na an samong tinios!”
Dangan nahiling na naglusad si Simoun naiikim su
