Siring sa mapanghiraw-od na pakimahérak ni Don Timoteo, ibinugtak kan Saiyang Kahalangkawan nin tunay na gayo su harong. Tinogtog kan orquesta su mareha real, asin su diosnon na pareja makamahalan na sominakat sa alfombradong hagyanan.
Su pagkagrabe kan Saiyang Kahalanekawan bakong pasagin lamang; sakalé magpoon kan pagdatong nya sa Kaporoan, iyo pa sanang pagmaté nya nin kamondoan; sarong bagay na malipungaw nakakatahob sa saiyang pagisip. Iyo ito an hiring tagumpay kan tolong taon na saiyang kapangyarihan, asin sa laog nin duwang aldaw, sagkod noarin pa man maglogsot sa siring kaitaas na kahalangkawan, Anong nabayaan nya sa saiyang talikondan? Dai isinasalingoy kan Saiyang Kahalangkawan an saiyang payo asin pinagmarahay nya na sa enotan maghiling, sa panahon na omaaboton! May dara syang kayamanan, darakilang halaga na nagkakatarago sa mga Banco sa Europa naghaharalat saiya, may mga hotel sya, alagad kadakol kan mga boot na saiyang pinapurula, dakol syang mga kaiwal sa Corte, su halangkaw na empleado naghahalat duman saiya! Iba pang mga general madaleng nagrayaman siring saiya, asin ngunyan mga dai nang sukat. Ano ta dai nagdanay nin halawig pang panahon siring sa ihinatol saiya ni Simoun? Dai, an marhay na dangog sukat mangibabaw sa gabos. Saré pa, su mga minataong-galang dai na minadoroko nin marhay siring kan énot; namamangnohan nya an mga nakapotitok na paghiling, asin makababaldi ngani; asin mapagmahal syang minapasalamat asin nagsasanay pati nin mga hoyom.
“!Talagang an tala-init nasa saiya nang solnopan!”’ an mapagmasid na tataramon ni Padre Irene sa pagdangog ni Ben Zayb; “kadakol na kan minahampang na minahiling saiya!”
“!Carambas! sa cura pa naman sasabihon nya iyan.
“Chica,” an hinghing sa saiyang kataid kan ominapod nin ananakot ki Don Timoteo, “nakita mo su falda?”
“Uy! su mga tabing kan Palacio!”
“!Halo tasin totoo! Tara dara nya gabos. Makikita mo ta magibo sya nin aliboy kan mga alfombra!”
“!Daing ibang mapapatunayan kaiyan kundi na may kalistohan asin kamuyahan!” an mapagmasid na tataramon kan agom na lalaki na sinagwe su saiyang agom nin sarong paghiling; “kaipuhan na maging matimol an
