34 Asin sa oras na nona nagcurahao si Jesús sa daculang tigñog, ¿Eli, Eli, Lammá sabacthani? na an casayudan Dios có, Dios co, ¿tádao ta pinabayaan mo acó?
35 Asin an magña ibá nin magña nagtirindog dihan, can madagñog ini, nagsarabi, Uya digdi, si Elias an inaapod nia.
36 Asin nagdalagan si sarô, binasa an sarong esponja sa sucâ, asin ibinugtac sa sarong cauayan, ipinainom ini saiya; na nagsarabi, Pabayaan nindo; hilgñon niato cun padidigdi si Elias ta gñaning ibabâ sia.
37 Alagad si Jesús pacacurahao sa daculang tigñog, naótsan.
38 Asin an tahob nin templo naguisi na nagcaduá, magpoón sa itaas sagcod sa ibaba.
39 Asin can an capitan, na nacatindog sa cahampang nia, mahiling na naótsan nin siring, nagsabi, Totoong gayo na ining tauong ini iyo an Aqui nin Dios.
40 Iguá man nin magña babaye na naghihiriling sa harayô na sa sainda magña dudumán si Maria Magdalena,* asin si Maria na ina ni Santiago an gñohod, asin ni José, asin si Salomé;
41 Na sinda, can sia dudumán pa sa Galilea, nagsosoronod saiya, asin piglilincodan sia; asin ibang balaquid na magña babaye, na nagturucad na cairiba nia sa Jerusalem.
42 Asin can domatong na an hapon, huli ta iyo si pagandam, na iyo, an aldao na vispera nin aldao nin paghigñalò,
43 Nagpadigdi si José na tagá Arimatea, consejal na mabini, na ini man naghahalat can cahadêan nin Dios; asin nangñahás sia na lomaog qui Pilato, hinagad nia an hauac ni Jesús.
44 Alagad si Pilato naggñagñalás na sia gadana asin ipinaapod nia an capitán, pighapot sia, cun nahaloy na nagadan.
45 Asin can matalastas nia sa capitán, itinogot an bancay qui José.
* Tagá Magdalá.
